Futzal. O‘zbekiston terma jamoasi Yaponiya bilan o‘rtoqlik o‘yinini o‘tkazadi
Futzal bo‘yicha O‘zbekiston milliy terma jamoasi a’zolari bugundan navbatdagi o‘quv-mashg‘ulot yig‘iniga kirishadi. Terma jamoaga chaqirilgan o‘yinchilar poytaxtimizdagi “Velara” mehmonxonasida istiqomat qilishadi. Mashg‘ulotlar esa “Yunusobod” sport majmuasida o‘tkaziladi.
Mazkur yig‘in 20–24 sentabr kunlari Bishkek shahrida bo‘lib o‘tadigan Osiyo Kubogi – 2026 saralash musobaqasi oldidan so‘nggi ko‘rik vazifasini o‘tab beradi.
Yig‘in davomida Osiyo qit’asi grandlaridan biri – Yaponiya terma jamoasi bilan nazorat uchrashuvida kuch sinashish ham rejalashtirilgan. Quyosh chiqish mamlakati termasiga qarshi o‘rtoqlik o‘yini 16 sentabr kuni soat 17:00 da “Yunusobod” sport majmuasida bo‘lib o‘tadi.
Eslatib o‘tamiz, O‘zbekiston milliy terma jamoasi 18 sentabr kuni Bishkekka uchib ketadi. Qirg‘iziston Respublikasi poytaxtida bo‘lib o‘tadigan Osiyo Kubogining F saralash guruhida terma jamoamiz mezbonlardan tashqari Sharqiy Timor hamda Falastin terma jamoalariga qarshi maydonga chiqishadi.
Murabbiylar shtabi bugun boshlanadigan yig‘inga quyidagi futzalchilarni jalb etgan:
Darvozabonlar – Abbos O‘lmasbekov ("BMB PFC"), Shavkat Ibragimov (“Oil Star”), Doniyor Umarov (“Lokomotiv”).
Himoyachilar – Ilhomjon Hamroev (“Oil Star”), Mashrab Odilov ("BMB PFC"), Shahzod Sa’diev ("BMB PFC").
Qanot o‘yinchilari – Behruz Samiev (“Oil Star”), Husniddin Nishonov ("BMB PFC"), Eldor Nighmatov (“Lokomotiv”), Muhammadali Husonov ("BMB PFC").
Qanot hujumchilari – Elbek To‘lqinov (“Oil Star”), Abbor Ahmedzyanov (OKMK), Muzaffar Abdukarimov (OKMK), Akbar Usmonov (SQB).
Hujumchilar – Muzaffar Ahadjonov ("BMB PFC"), Davlat Ibragimov ("BMB PFC").
