Futzal. Oliy liga–2025/2026: yubiley gollar xronikasi
Futzal ishqibozlari Oliy liga–2025/2026 mavsumining dastlabki 6 turida bir qator esda qolarli yubiley gollarining guvohi bo‘lishdi. Qisqa vaqt ichida yuzlab gollar kiritilgani joriy mavsumning sermahsul davom etayotganidan dalolat bermoqda.
Xususan, chempionatning 100-goli 1-tur doirasida o‘tgan “Dinamo” — “Qizilqum” uchrashuvining 30-daqiqasida kiritildi. Bu gol muallifi navoiyliklar hujumchisi Alayor Sadirov bo‘ldi.
200-golning muallifi ham “Qizilqum” safidagi futbolchi bo‘ldi. Navoiyliklarning braziliyalik legioneri Henrike Suares Gimaraesh 2-turdagi OKMK — “Qizilqum” bahsining 17-daqiqasida o‘z hisobiga yubiley gol yozdirib qo‘ydi.
Chempionatdagi 300-gol Qarshining “Nasaf” jamoasi legioneri Ernest Saipidinov tomonidan urildi. U 3-turda BMBga qarshi o‘yinning 15-daqiqasida ushbu tarixiy gol muallifi bo‘ldi.
400-gol esa 4-tur doirasida o‘tkazilgan “Qizilqum” — “Surxon” uchrashuvida kiritildi. Termizliklar jamoasi o‘yinchisi Shomansur Shobahromov 26-daqiqada raqib darvozasini ishg‘ol etib, ushbu yubiley golni nishonladi.
500-gol ham “Qizilqum” ishtirokida qayd etildi. Navoiyliklar darvozasiga SQB jamoasining braziliyalik hujumchisi Paxaro Simankis Xose Grigorio tomonidan uchrashuvning 15-daqiqasida urilgan gol yubiley sifatida ro‘yxatga olindi.
Chempionatdagi 600-gol esa 6-turda Jizzax shahrida qayd etildi. OKMK — “Surxon” uchrashuvining 25-daqiqasida Toshkent viloyati jamoasi o‘yinchisi Fazliddin Botirov ushbu tarixiy gol muallifiga aylandi.
