Freestyle Chess Grand Slam Paris. Abdusattorov va Yan Nepomnyashchiy o'rtasidagi ilk uchrashuv yakunlandi
Fransiya poytaxti Parijda nufuzli shaxmat turniri - Freestyle Chess Grand Slam Paris davom etmoqda. Umumjahon grossmeysteri, o'zbekistonlik Nodirbek Abdusattorov rossiyalik Yan Nepomnyashchiyga qarshi 7-o'rin uchun bahs olib bormoqda.
13-aprel kuni ikki shaxmatchi o'rtasidagi birinchi partiya bo'lib o'tdi. Nodirbek oq toshlar bilan o'yinni boshladi, ammo rossiyalik raqibiga yutqazdi. Endi Abdusattorov 7-o'rin uchun kurashni davom ettirish maqsadida albatta g'alaba qozonishi shart. Agar hisob tenglassa, tay-breyk o'tkaziladi.
Javob uchrashuvi 14-aprel kuni bo'lib o'tadi va unda o'zbek shaxmatchisi qora toshlar bilan o'ynaydi. Turnir finaliga Magnus Karlsen va Hikaru Nakamura yo'l oldi. Finalning birinchi partiyasida oq toshlar bilan o'ynagan Karlsen g'alaba qozondi. Finalning ikkinchi uchrashuvi ham 14-aprel kuni o'tkaziladi.
