Fotima Saipovaga Prezident topshirig‘i bilan yangi uy berildi
Paravelosport bo‘yicha O‘zbekiston terma jamoasi a’zosi, Osiyo chempioni Fotima Saipovaga yangi uy sovg‘a qilindi. Ushbu tashabbus Prezident Shavkat Mirziyoyevning topshirig‘i asosida amalga oshirildi.
Tantanali marosim Toshkent viloyatining Chirchiq shahridagi “Yangi O‘zbekiston” massivida bo‘lib o‘tdi. Unda viloyat hokimi Zoyir Mirzayev, faollar hamda ommaviy axborot vositalari vakillari ishtirok etdi. Saipovaga barcha qulayliklarga ega, jihozlangan ikki xonali xonadon kalitlari topshirildi.
Ma’lumot o‘rnida, Fotima Saipova so‘nggi to‘rt yilda paravelosportda faol ishtirok etib kelmoqda. U xalqaro musobaqalarda O‘zbekiston sharafini munosib himoya qilgan, mamlakat chempionatlarida to‘rt bor g‘oliblikni qo‘lga kiritgan. Yaqinda Tailandda bo‘lib o‘tgan Osiyo chempionatida shosse yo‘nalishida 1-o‘rinni egallagan.
