FIDE Grand Swiss 2025: Samarqanddagi nufuzli shaxmat turniri ishtirokchilari ma'lum bo‘ldi
2025 yilning 3–16 sentabr kunlari Samarqand shahrida xalqaro darajadagi yirik shaxmat musobaqasi — FIDE Grand Swiss turniri bo‘lib o‘tadi. Unga jahonning yetakchi grossmeysterlari to‘plangan bo‘lib, umumiy mukofot jamg‘armasi qariyb 1 million AQSh dollarini tashkil etadi.
Bellashuvlar shveytsarcha tizimda, 11 turdan iborat tarzda Open (erkaklar) va Women’s (ayollar) guruhlarida o‘tkaziladi.
Jami 172 nafar shaxmatchi ishtirok etadigan mazkur musobaqa “Nomzodlar turniri – 2026”ga yo‘l olish uchun muhim imkoniyat hisoblanadi. Har ikki guruhdagi birinchi va ikkinchi o‘rin sohiblari ushbu nufuzli turnirga yo‘llanma qo‘lga kiritadi.
Mukofot jamg‘armasi:
• Open: 625 000 AQSh dollari
• Women’s: 230 000 AQSh dollari
Open guruhida jahon chempioni Gukesh Dommaraju, Arjun Erigaisi, Praggnanandhaa (Hindiston), Alireza Firouzja (Fransiya), Yan Nepomnyashchiy (Rossiya), Anish Giri (Niderlandiya), Shaxriyar Mamedyarov (Ozarbayjon), Levon Aronyan (AQSh) kabi dunyo yulduzlari ishtirok etadi.
O‘zbekiston sharafini esa Nodirbek Abdusattorov, Javohir Sindarov, Nodirbek Yakubboev va Shamsiddin Vohidov himoya qiladi. Women’s guruhida Gulruhbegim Tohirjonova dona suradi.
Samarqanddagi ushbu superturnir nafaqat mukofot jamg‘armasi, balki shaxmat olami uchun hal qiluvchi natijalari bilan ham e’tiborga loyiq bo‘ladi.
