FIA Bosh Assambleyasi va FIA Awards 2025 tantanali marosimiga tayyorgarlik masalalari bo‘yicha uchrashuv bo‘lib o‘tdi
Markaziy Osiyo tarixida birinchi bor — Xalqaro Avtomobil Federatsiyasining (FIA) Bosh Assambleyasi hamda FIA Awards — avtomobil sporti hamjamiyatining eng kutilgan tadbirlaridan biri o‘tkaziladi.
FIAning yillik tantanali mukofotlash marosimi har doim yorqin voqea bo‘lib, xalqaro avtomobil sportining asosiy yo‘nalishlari bo‘yicha barcha chempionlarni bir sahnaga jamlab, ularga FIAning rasmiy mukofotlarini topshirish bilan ajralib turadi.
O‘zbekiston poytaxti — Toshkent shahri 2025-yil dekabr oyida FIA Bosh Assambleyasi va FIA Awards tantanali mukofotlash marosimiga mezbonlik qiladi.
2025-yil 14-noyabr kuni O‘zbekiston Milliy Olimpiya qo‘mitasida Qo‘mita rahbariyati va O‘zbekiston Milliy Avtomobil va Karting Federatsiyasi ishtirokida ushbu yirik tadbirga tayyorgarlik masalalarini muhokama qilish bo‘yicha uchrashuv bo‘lib o‘tdi.
