Federatsiyada kuch tuzilmalari vakillari bilan uchrashuv o‘tkazildi
O‘zbekiston dzyudo federatsiyasida mamlakatimizning kuch tuzilmalari mas’ul xodimlari ishtirokida yig‘ilish bo‘lib o‘tdi.
Federatsiya raisi Azizjon Kamilov qatnashgan ushbu yig‘ilishda bir qator dolzarb va shu bilan birga muhim yo‘nalishlar - mashg‘ulotlar, musobaqalar va uning tashqarisidagi intizomni ta’minlash, dopingga yo‘l qo‘ymaslik, sportchilarning mas’uliyat darajasini oshirish kabi masalalar ko‘rib chiqildi.
Xalqaro maydonda yurtimiz sharafini himoya qilayotgan, bir vaqtning o‘zida kuch tuzilmalarida xizmat qilayotgan dzyudochilar halollik, professionallik va vatanparvarlik namunasi bo‘lib xizmat qilishi kerakligi ta’kidlandi.
Ta’kidlanganidek, dzyudo federatsiyasi va davlat tuzilmalari o‘zaro hamkorlikni mustahkamlash, mavjud kamchiliklarni birgalikda bartaraf etish, sportchilarni tayyorlash va tarbiyalash tizimini takomillashtirish, yuksak mas’uliyat va "toza sport" tamoyillariga sodiqlik ruhida hamkorlikni davom ettiradi.
Yig‘ilishda tomonlar oldinda turgan musobaqalar - kattalar o‘rtasidagi Osiyo o‘yinlari, jahon chempionati, kadetlar va yoshlar uchun - jahon va Osiyo chempionatlariga munosib tayyorgarlik ko‘rish, ushbu startlarga jamoaning barcha imkoniyatlarini to‘liq safarbar qilish mavzusini ham muhokama qilishdi.
Bundan tashqari, xalqaro turnirlar va o‘quv-mashg‘ulot yig‘inlarida ishtirok etish davrida sportchilarni xizmat vazifalaridan vaqtincha ozod qilish masalasi ham kun tartibida bo‘ldi. Bu esa sport tayyorgarligiga maksimal darajada e’tibor qaratish va belgilangan maqsadlarga erishish imkonini beradi.
