Endi Vudvord: AQShda shaxmatchilar uchun qo‘llab-quvvatlash deyarli yo‘q
Tata Steel Challengers turnirida g‘alaba qozongan amerikalik grossmeyster Endi Vudvord homiylik masalasi va professional shaxmatchi bo‘lish rejalari haqida fikr bildirdi.
Uning aytishicha, hozir AQShda shaxmat uchun jiddiy tizimli qo‘llab-quvvatlash yetarli emas.
Vudvordning ta’kidlashicha, AQShda shaxmatni eng faol qo‘llab-quvvatlayotgan insonlardan biri — Reks Sinkfild va Sent-Luis shaxmat klubi. Ular kuchli turnirlar tashkil qiladi va ayniqsa o‘smirlar o‘rtasidagi musobaqalarda yirik mukofot jamg‘armalarini taqdim etadi.
Biroq muammo boshqa joyda:
— Agar aynan korporativ homiylar haqida gapirsak, AQShda shaxmatni qo‘llab-quvvatlaydigan kompaniyalar deyarli yo‘q. Bu esa katta muammo. Ayniqsa biz musobaqalarga kattalar hamrohligida borishimiz kerak bo‘lganida, xarajatlar deyarli ikki baravar oshadi.
Uning fikricha, yuqori darajaga chiqishni istagan yosh shaxmatchilar uchun eng katta to‘siqlardan biri — aynan moliyaviy masala.
Hozircha uning asosiy daromad manbai — turnirlardagi mukofot pullari. Shu bilan birga, otasi ham moliyaviy tomondan yordam bermoqda.
— Men professional shaxmatchi bo‘lish uchun qo‘limdan kelgan hamma narsani qilishga harakat qilaman. Lekin hozirgi darajadan to shaxmat to‘liq kasbga aylanish darajasigacha yetish juda qiyin. Bu juda ko‘p mehnat, kuch va qo‘llab-quvvatlash talab qiladi. Keyingi bir necha yil qanday o‘tishini ko‘ramiz.
