Dzyudo. Qarshi mezbonligida XIX M. Omariyev xalqaro xotira turniri – yosh dzyudochilar mahorat maydonida
Qarshi shahridagi “GEOLOG” sport majmuasi navbatdagi yirik sport bayramiga mezbonlik qilmoqda. Bu yerda dzyudo bo‘yicha 2010–2012 hamda 2013–2014-yillarda tug‘ilgan o‘smirlar o‘rtasida sport ustasi Minkail Omariyev xotirasiga bag‘ishlangan XIX xalqaro turnir yuqori saviyada tashkil etildi.
Turnirning tantanali ochilish marosimi ko‘tarinki ruhda o‘tdi. Tadbirda viloyat sport boshqarmasi boshlig‘i Vahob Ro‘ziyev, sport faxriylari, murabbiylar va yosh sportchilar ishtirok etib, ushbu nufuzli musobaqa yoshlar sportini rivojlantirish, iqtidorli dzyudochilarni kashf etishda muhim ahamiyat kasb etishini ta’kidlashdi.
Musobaqaning birinchi kuni jamoaviy bahslar bilan start oldi. Tatamida keskin, murosasiz va tomoshabop bellashuvlar kechdi. Kuch, iroda va texnik mahorat sinovidan o‘tgan yosh sportchilar tomoshabinlarga haqiqiy dzyudo bayramini tuhfa etishdi.
