Dzyudo. OTP Group Tashkent Grand Slam 2026 turniriga qur’a tashlash marosimi bo‘lib o‘tdi
Ertaga poytaxtimizdagi "Humo Arena" majmuasida start oladigan “Katta Dubulg‘a” turkumiga kiruvchi, mukofot jamg‘armasi 154 000 yevrodan iborat nufuzli musobaqaga qur’a tashlandi.
Tadbirda O‘zbekiston Respublikasi Prezidentining sport bo‘yicha vakili Odil Abdurahmonov, Milliy olimpiya qo‘mitasi Bosh kotibi Oybek Kasimov, mamlakat dzyudo federatsiyasi raisi Azizjon Kamilov, Xalqaro dzyudo federatsiyasi Sport direktori Vladimir Barta, IJF Bosh Referi direktori Armen Bagdasarov hamda IJF Ta’lim va murabbiylik bo‘yicha direktori Muhammad Merijda ishtirok etdi.
Marosimda so‘z olgan Odil Qalandarovich davlatimiz rahbari boshchiligida barcha sport turlari, xususan, dzyudo rivoji yo‘lida olib borilayotgan ishlar haqida gapirib, barcha sportchilarga g‘alaba va omad tiladi.
"Tashkent Grand Slam 2026" turniriga mezbonlik qilish biz uchun katta sharaf. Bu voqea Yangi O‘zbekistonda sport milliy g‘oyaga aylangani, sportchilarimiz xalqaro maydonda dunyoning munosib elchilari bo‘lib maydonga chiqayotganining yorqin ramzidir. O‘zbekistonda shaxsan Prezidentimiz Shavkat Mirziyoyev tomonidan professional hamda ommaviy sport rivoji, bu orqali jamiyatda sog‘lom turmush tarzini yanada qaror toptirishga davlat siyosati darajasida e’tibor qaratilmoqda. Xalqaro olimpiya qo‘mitasi hamda Jahon sporti tashkilotlari bilan o‘zaro hamkorlik yangi bosqichga ko‘tarilyapti. Sportchilarimiz tarixiy natijalarga erishishyapti", - dedi Abdurahmonov.
