Dzyudo. Federatsiyada hakamlik masalasi muhokama qilindi
O‘zbekiston dzyudo federatsiyasi raisi Azizjon Kamilov barcha yo‘nalishlarda islohotlarni o‘tkazish bo‘yicha topshiriq bergan edi. Shu maqsadda Federatsiyada navbatdagi yig‘ilish o‘tkazildi va unda hakamlik masalasi ko‘rib chiqildi.
Federatsiya bosh kotibi Aziz Sobirov boshchilik qilgan yig‘ilishda dzyudo hakamligidagi yutuq va kamchiliklar muhokama qilinib, referilik yo‘nalishidagi ishlarni takomillashtirish, barcha yosh toifalaridagi musobaqalarda shaffof, adolatli hakamlikni joriy qilish, referilarni attestatsiyadan o‘tkazish, ularning reyting baholash tizimini doimiy tarzda yuritish, IJF bayrog‘i ostidagi musobaqalarda ishlaydigan referilarimiz sonini ko‘paytirish kabi yo‘nalishlar ko‘rib chiqildi.
Bundan tashqari, yig‘ilishda yangilik sifatida referilar uchun mo‘ljallangan "Judo Manager" dasturi ishga tushirilishi ham aytib o‘tildi.
Yig‘ilish yakunlari bo‘yicha O‘zbekistonda hakamlik tizimini takomillashtirishning ustuvor vazifalari va kelgusidagi ish yo‘nalishlari belgilab olindi.
