Dzyudo. Аzizjon Kamilov Ozarbayjonga yo‘l olayotgan terma jamoamiz bilan uchrashdi
O‘zbekiston erkaklar terma jamoasi 19-31 yanvar kunlari Ozarbayjon poytaxti Boku shahrida tashkil etiladigan xalqaro o‘quv-mashg‘ulot yig‘inida qatnashadi.
Safar oldidan O‘zbekiston dzyudo federatsiyasi raisi Azizjon Kamilov murabbiy va dzyudochilar bilan uchrashdi. Azizjon Yakubjanovich har bir dzyudochi bilan alohida suhbatlashdi. Federatsiya rahbari 2026 yilgi taqvimdan o‘rin olgan mas’uliyatli musobaqalardagi natijalar tayyorgarlikka bog‘liq ekanini urg‘ulab, mashg‘ulotlarda astoydil ishlash, o‘tgan mavsum yo‘l qo‘yilgan xato va kamchiliklarni bartaraf etishga chaqirdi.
Ma’lumot uchun, bir nechta davlat ishtirokida o‘tadigan Ozarbayjondagi xalqaro o‘quv-mashg‘ulot yig‘iniga terma jamoamizning 11 nafar dzyudochisi yo‘l olmoqda. Yig‘ilishda o‘zbek dzyudosi afsonasi, uch karra Olimpiya o‘yinlari sovrindori Rishod Sobirov ham ishtirok etdi.
