Dzudo. Jahon chempionatining ilk kuniyoq 4 ta medal qo‘lga kiritdik. Sirojiddinova - Jahon chempioni
Ekvadorning Guayakil shahrida yilning o‘smirlar ishtirokidagi asosiy musobaqasi - Jahon chempionati start oldi.
Dunyo birinchiligining birinchi kungi bellashuvlari O‘zbekiston o‘smirlar terma jamoasi uchun muvaffaqiyatli keldi. Aurelio Chiprian-Flis bosh murabbiyligidagi kadetlarimiz 1 ta oltin, 3 ta bronza medaliga sazovor bo‘lishdi.
Quvonarlisi, Iroda Sirojiddinova barcha raqibalarini mag‘lubiyatga uchratib, o‘smirlar o‘rtasida Jahon chempioniga aylandi. -40 kg vazn toifasida yurtimiz sharafini himoya qilgan Iroda haqiqiy ma’noda iroda namoyish etdi. To‘g‘ridan to‘g‘ri ikkinchi bosqichdan bahslarga kirishgan Sirojiddinova ozarbayjonlik Sunay Salamova, 1/2 finalda rossiyalik Emiliya Sayfutdinova hamda final bahsida qozog‘istonlik Adiya Janaxmetni mag‘lubiyatga uchratdi. Olis Ekvador zaminida O‘zbekiston Respublikasi davlat madhiya yangradi. Iroda bir oy oldin Iordaniyada o`tgan Osiyo chempionatida ham oltin medal qo`lga kiritgandi.
Terma jamoamiz a’zolaridan Bobur Yusupov (-55 kg), Alina Kolyucheva (-44 kg) va Charos Hikmatova (-48 kg) jahon chempionatining bronza medaliga sazovor bo‘ldi.
Birinchi kungi bellashuvlardan so‘ng O‘zbekiston terma jamoasi 1 ta oltin va 3 ta bronza medali bilan 60 davlat orasida umumjamoa hisobida 2-o‘rinni egallab turibdi.
