Dastin Porye mast holatda jamoat joyida koʻringani uchun hibsga olindi
Yengil vazn toifasida (70 kg gacha) UFC sobiq vaqtinchalik chempionlik kamari sohibi, 37 yoshli amerikalik Dastin Porye kecha, 21-iyun kuni jamoat joyida alkogol taʼsirida mast holatda boʻlgani uchun huquq-tartibot idoralari tomonidan ushlandi. Bu haqda TMZ portali xabar bermoqda.
Biroq Poryening hibsga olinishi bilan bogʻliq aniq tafsilotlar hozircha maʼlum emas. Ayni paytda Dastin allaqachon qoʻyib yuborilgan va erkinlikda hisoblanadi. Taʼkidlash joizki, Jorjiya shtati qonunchiligiga koʻra, jamoat joyida mast holatda paydo boʻlganlik uchun ayblov tasdiqlangan taqdirda bir yilgacha ozodlikdan mahrum qilish va/yoki jarima jazosi belgilanishi mumkin.
Porye oʻzining aralash yakkakurashlardagi professional faoliyati davomida 30 ta gʻalaba (shulardan 24 tasi muddatidan oldin) qayd etgan, 10 bor magʻlubiyatga uchragan va uning ishtirokidagi bitta jang oʻtkazilmagan deb topilgan.
