Batumida Kurash bo‘yicha Yevropa chempionatiga start berildi
Gruziyaning Batumi shahridagi Muxran Vaxtangadze nomidagi sport majmuasi kurash bo‘yicha Yevropa chempionatiga mezbonlik qilmoqda.
Bahslarning dastlabki kunida o‘smir yoshdagi kurashchilar g‘oliblik uchun gilamga chiqib, muxlislarga shiddatli va qiziqarli bellashuvlarni taqdim etdilar.
Chempionatning boshlanishidan oldin Xalqaro Kurash Assotsiatsiyasi (IKA) Bosh kotibi Muhammad Reza Nassiri tomonidan musobaqani boshqarib boruvchi hakamlar va xalqaro texnik rasmiylar (ITO) uchun texnik seminar o‘tkazildi. Seminar davomida musobaqa qoidalari va hakamlikning zamonaviy talablari muhokama qilindi.
Shundan so‘ng, 19 ta vazn toifasida o‘smirlar o‘rtasidagi qizg‘in bellashuvlar start oldi. Yosh polvonlar o‘z mahoratlarini namoyish etib, musobaqaning keyingi bosqichlariga yo‘l olish uchun kurash olib bordilar.
Bugun, shuningdek, Yevropa chempionatining rasmiy ochilish marosimi bo‘lib o‘tadi. Marosimda nufuzli mehmonlar ishtirok etishi va musobaqaning birinchi kuni g‘oliblarini taqdirlash marosimi ham bo‘lib o‘tishi kutilmoqda.