Badiiy gimnastika bo‘yicha “Viloyat hokimi olimpiadasi” musobaqasi o‘tkazildi
Navoiyda “Yangi O‘zbekiston – Olimpiya cho‘qqilari” sport musobaqalari dasturi doirasida badiiy gimnastika sport turi bo‘yicha “Navoiy viloyati hokimi olimpiadasi” musobaqalari yuqori saviyada tashkil etildi.
Musobaqalar Navoiy viloyati Gimnastika sport turlariga ixtisoslashtirilgan sport maktabida bo‘lib o‘tdi. Unda viloyatning barcha shahar va tumanlaridan tashrif buyurgan iqtidorli hamda istiqbolli sportchilar o‘zaro kuch sinashdilar.
Bellashuvlar davomida yosh gimnastikachilar o‘zlarining yuksak mahorati, nafis va jozibador chiqishlari, shuningdek, sportga bo‘lgan qat’iyati hamda intilishlarini namoyon etdilar. Musobaqalar qizg‘in va murosasiz kurashlar ostida kechib, ishtirokchilarning har biri munosib natijalarga erishish yo‘lida bor salohiyatini ishga soldi.
G‘olib va sovrindorlarni taqdirlash marosimida Navoiy viloyat Sport boshqarmasi boshlig‘i Jasur Murtozayev, MOQ Navoiy viloyati ijrochi direktori Farhod Rahmonov hamda maktab direktorlari va soha mutasaddilari ishtirok etib, sportchilarni respublika bosqichidagi bahslarda omad va zafarlar tiladilar. Bellashuvlar yakuniga ko‘ra g‘olib va sovrindorlar tantanali ravishda taqdirlandi.