Azizjon Kamilov Qozog‘istonda mashg‘ulot o‘tkazayotgan terma jamoamiz bilan muloqot qildi
Azizjon Kamilov Qozog‘istonda mashg‘ulot o‘tkazayotgan terma jamoamiz bilan muloqot qildi
Ma’lumki, shu kunlarda O‘zbekiston erkaklar va ayollar terma jamoalari Qozog‘istonning Almati shahrida o‘tkazilayotgan xalqaro o‘quv-mashg‘ulot yig‘inida ishtirok etmoqda.
Dunyoning o‘ttizdan ortiq davlatidan kelgan yetti yuz nafarga yaqin dzyudochi qatnashayotgan ushbu katta masshtabdagi yig‘in ishtirokchilar uchun Osiyo o‘yinlari hamda jahon chempionatiga tayyorgarlik vazifasini o‘tab beryapti. Dunyoning eng kuchli sportchilari bilan har kuni bir tatamida ishlash imkoniyati nafaqat mashg‘ulot jarayoni sifatini oshirish, balki qimmatli musobaqa amaliyotiga ega bo‘lish imkonini ham beradi.
Yilning bu ikki musobaqasi dzyudochilarimiz uchun juda ham muhim hisoblanadi. Shu maqsadda O‘zbekiston dzyudo federatsiyasi raisi Azizjon Kamilov ZOOM platformasi orqali terma jamoamiz a’zolari bilan suhbatlashdi, yaratilgan sharoitlar bilan tanishdi.
Murabbiylar o‘quv-mashg‘ulot yig‘ini, musobaqaga olib borilgan tayyorgarlik, ko‘plab Olimpiada va jahon chempionlari ishtirokida o‘tkazilayotgan xalqaro yig‘inning foydali jihatlari haqida to‘liq hisobot berib, dzyudochilarimizning har biri bo‘yicha alohida ma’lumot taqdim etishdi.
Yig‘inning har bir kunidan unumli foydalanib, Osiyo o‘yinlari va jahon chempionatiga eng yaxshi formada yetib borish asosiy vazifa hisoblanadi.
