Aliyev va Berdimuratov — Budapeshtdagi reyting turniri sovrindorlari!
17–20 iyul kunlari Vengriya poytaxti Budapeshtda sport kurashlari bo‘yicha an’anaviy Polyák Imre & Varga János Memorial reyting turniri bo‘lib o‘tdi. Unda yunon-rum kurashi bo‘yicha terma jamoamiz vakillari ishtirok etdi.
72 kg vazn toifasida Abdullo Aliyev musobaqa finaligacha yetib bordi. Gruziyalik, Yevropa chempionati sovrindori Yuri Lomadzega qarshi hal qiluvchi bahsda 2:8 hisobida yutqazgan hamyurtimiz kumush medalga sazovor bo‘ldi. Aliyev bugungacha U-20 va U-23 yoshlar o‘rtasida Osiyo chempioni bo‘lib, kattalar o‘rtasidagi qit’a birinchiligida ikkinchi o‘rinni egallagan.
82 kg vaznda kurashgan Jalgasbay Berdimuratov esa bronza medali uchun kechgan bellashuvda rossiyalik Rafael Yunusov ustidan 2:1 hisobida g‘alaba qozondi.
Shu tariqa, yunon-rum kurashi bo‘yicha kurashchilarimiz Budapeshtdagi musobaqani ikki medal — bir kumush va bir bronza bilan yakunlashdi.
