Afg'onistonda shaxmat haram deb e'lon qilinib, taqiqlanadi
"Tolibon" hukumati shaxmat o‘yinini haram deb e’lon qildi va uni taqiqladi. Afg‘oniston Shaxmat federatsiyasi o‘z faoliyatini to‘xtatmoqda. Sportchilar esa o‘ynash imkoniyatini saqlab qolishni so‘ramoqda. Afg‘onistonlik toliblar shaxmatni haram deb topishdi. Federatsiya yopildi, amir farmoni uning faoliyatini davom ettirish imkoniyatini bekor qildi.
9 may kuni afg‘onistonlik shaxmatchilar Sport va jismoniy tarbiya departamentiga murojaat qilib, shaxmat o‘ynash va moliyaviy yordam olish imkoniyatini saqlab qolishga umid qilishgan edi. Ammo rad javobini olishdi — amirning farmonida istisnolar ko‘zda tutilmagan.
Afg‘oniston Shaxmat federatsiyasi "Tolibon" hokimiyatga kelganidan keyin ham o‘z faoliyatini davom ettirib kelayotgan, erkaklar va ayollarni o‘qitib, mamlakat bo‘ylab musobaqalar uyushtirib turgan edi.
Ayni paytda butun dunyoda shaxmat aqliy va ta’limiy sport turi sifatida e’tirof etilgan. Afg‘onistonlik sportchilar shaxmatning taqiqlanishi nafaqat sport rivojiga zarba berishi, balki mamlakatdagi ko‘p yillik shaxmat an’analariga ham barham berishidan qo‘rqmoqda.
