Abdusattorov hozircha omad topmadi
AQShning Sent-Luis shahrida o‘tkazilayotgan mukofot jamg‘armasi 350 ming dollarlik Grand Chess Tour’ning yakuniy klassik bosqichi — Sinquefield Cup 2025’ning 5-tur o‘yinlari bo‘lib o‘tdi. Turnir 29 avgustgacha davom etib, aylana tizimda 9 turdan tashkil topgan. Bu bosqich GCT ochkolarini to‘plash uchun so‘nggi imkoniyat hisoblanadi.
Dunyo shaxmatining 10 yetakchi grossmeysteri qatorida yurtimiz nomidan Nodirbek Abdusattorov (2771) ham ishtirok etmoqda. Ammo u hozircha omad topa olmadi: 5 o‘yinning uchtasida mag‘lub bo‘lib, ikkitasi durang bilan yakunlandi. Xususan, 3-turda hindistonlik Rameshbabu Pragg’nanandhaa (2779)ga, 5-turda esa amerikalik Sem Seviyanga qarshi durangga rozi bo‘ldi. Qizig‘i shundaki, 5-turdagi barcha partiyalar durang bilan yakunlandi.
Bugun turnirda dam olish kuni. Ertagi 6-turda Abdusattorov oq donalarda fransiyalik Maksim Vashye-Lagravga qarshi bahs olib boradi. Fransiyalik grossmeyster 5 partiyadan 2,5 ochko to‘plab, qo‘shimcha ko‘rsatkichlar asosida 5-o‘rinda turibdi. Hozircha Nodirbek 1 ochko bilan 10-o‘rinda qolmoqda.
5-tur natijalari:
• Yan-Krishtof Duda – Gukesh Dommaraju ½–½
• Fabiano Karuana – Uesli So ½–½
• Sem Seviyan – Nodirbek Abdusattorov ½–½
• Alireza Firuzja – Levon Aroniyan ½–½
• Maksim Vashye-Lagrav – Rameshbabu Pragg’nanandhaa ½–½
6-tur juftliklari:
• Nodirbek Abdusattorov – Maksim Vashye-Lagrav
• Gukesh Dommaraju – Alireza Firuzja
• Rameshbabu Pragg’nanandhaa – Yan-Krishtof Duda
• Sem Seviyan – Fabiano Karuana
• Levon Aroniyan – Uesli So
