Abdullayev Abdurahmon xalqaro Gran-pri musobaqasida kuchli beshlikdan joy oldi
2025-yil 8-iyun kuni Estoniyaning Pärnu shahrida bo‘lib o‘tgan CSI2*-W toifasidagi xalqaro ot sportining to‘siqlardan sakrash (konkur) yo‘nalishidagi musobaqada O‘zbekiston terma jamoasi a’zosi Abdullayev Abdurahmon yurtimiz sharafini munosib himoya qildi.
Mazkur musobaqada sportchimiz 1.50 metr balandlikdagi to‘siqlardan sakrash bo‘yicha Gran-pri yo‘nalishida muvaffaqiyatli ishtirok etib, umumiy natijalar asosida 5-o‘rinni egalladi.
Ushbu yutuq Abdullayev Abdurahmonning xalqaro sport maydonlaridagi yuksak salohiyati va professionalligi, shuningdek, O‘zbekiston ot sporti maktabining yetuklik darajasini yana bir bor namoyon etdi.
Dunyoning turli mamlakatlaridan tashrif buyurgan kuchli sportchilar ishtirokida o‘tgan ushbu nufuzli musobaqada Abdullayevning mahorati, tayyorgarligi va qat’iyati e’tiborga molik bo‘ldi.
