«Yuventus» yozda Kopmeynersni sotib yubormoqchi
Turinliklar byudjetni barqarorlashtirish uchun bir nechta futbolchilar bilan xayrlashmoqchi.
FOTO: Getty Images
«Yuventus» kelayotgan yozda niderlandiyalik yarimhimoyachi Tyun Kopmeynersni sotib yubormoqchi. Bu haqda Tuttosport nashri xabar bermoqda.
Turin klubi budjetni barqarorlashtirish maqsadida yaqinlashib kelayotgan transfer oynasida bir necha o‘yinchilarni sotishi zarur. Aynan Kopmeyners jamoani tark etishga asosiy nomzodlardan biri bo‘lishi kutilmoqda.
Futbolchi «byankonerilar» tarkibida o‘zini to‘liq ko‘rsata olmadi, shu sababli turinliklar xavbek uchun kamida 30 million yevro olishni umid qilishmoqda. «Manchester Yunayted» va «Galatasaroy» futbolchi uchun asosiy da’vogarlar hisoblanadi.
Joriy mavsumda Kopmeyners 40 ta o‘yinda maydonga tushib, 2 ta gol urdi va bitta golli uzatmani amalga oshirdi.
Nasrullo Karimov
Jurnalist