«Yuventus» yangi gorizontal chiziqli libosini taqdim etdi
Turinning «Yuventus» klubi o‘zining rasmiy saytida kutilmagan dizayndagi qo‘shimcha libosini (uchinchi komplekt) taqdim etdi. Yangi forma klubning an’anaviy vertikal chiziqlaridan farqli o‘laroq, gorizontal chiziqlar uslubida ishlangan.
Ushbu noodatiy dizayn 1996/1997 yilgi mavsumdan ilhomlangan bo‘lib, o‘sha paytda bu g‘oya faqat eksperiment sifatida qolib ketgan edi.
Klub bayonotida shunday deyiladi:
«1996/1997 yilgi mavsum biz uchun ilhom manbayi bo‘ldi. O‘shanda «Yuventus» o‘zining anʼanaga aylangan oq-qora ranglarini gorizontal ko‘rinishda sinab ko‘rgan, ammo bu rasmiy uchrashuvlarda qo‘llanilmagan edi. Oradan deyarli o‘ttiz yil o‘tib, ushbu tasavvur haqiqatga aylandi. Bu dizayn bizning jasorat, innovatsiya va an’analarga qarshi chiqishga intilishimizni ifodalaydi».
Ushbu yangi va noodatiy libosda «Yuventus» futbolchilari ilk bor ertaga, 21 fevral kuni A Seriya doirasidagi «Komo»ga qarshi o‘yinda maydonga tushishadi.
