«Yuventus» Kenan Yildiz borasida «Chelsi» va «Arsenal»ga rad javobini berdi
Turinning «Yuventus» klubi turkiyalik hujumchi Kenan Yildizning transferi boʻyicha «Chelsi» va «Arsenal» jamoalaridan boʻlgan takliflarga yakuniy javobini qaytardi. Unga koʻra, yosh yulduz Turinda qoladi va klub uni qoʻyib yuborish niyatida emas. Bu haqda taniqli insayder Nikolo Skira ijtimoiy tarmoqdagi sahifasida xabar berdi.
Manbaga koʻra, «Yuventus» rahbariyati London klublarining 21 yoshli futbolchi borasidagi soʻrovlariga qatʼiy munosabat bildirgan. «Chelsi» va «Arsenal» tomonidan taklif etilgan jiddiy mablagʻlarga qaramay, Yildiz jamoaning daxlsiz futbolchisi hisoblanadi hamda u sotilmaydi yoki boshqa oʻyinchiga almashtirilmaydi.
Joriy mavsumda Yildiz «Yuventus» safida barcha turnirlar doirasida 47 ta uchrashuvda maydonga tushib, 11 ta gol urdi va 10 ta golli uzatmani amalga oshirdi. Uning turinliklar bilan amaldagi shartnomasi 2030 yilga qadar moʻljallangan boʻlib, Transfermarkt portali hujumchining ayni paytdagi bozor qiymatini 70 million yevro deb baholagan.
