Yilning eng yaxshi klubi sovriniga nomzodlar e’lon qilindi
France Football tomonidan topshiriladigan “Yilning eng yaxshi erkaklar klubi” sovriniga nomzodlar e’lon qilindi. Yakuniy ro‘yxatdan “Arsenal”, “Bavariya”, “Budyo-Glimt”, “Flamengo” va “Pari Sen-Jermen” klublari joy oldi.
Nomzodlar 2025/26-yilgi mavsumdagi natijalari bilan ajralib turdi. “Arsenal” Angliya chempionligini qo‘lga kiritgan bo‘lsa, “Bavariya” Germaniyada uchta sovringa ega chiqdi. “Budyo-Glimt” Norvegiya kubogini, “Flamengo” esa Libertadores kubogi va Braziliya chempionligini qo‘lga kiritdi.
“Pari Sen-Jermen” esa Chempionlar Ligasi, Liga 1, Yevropa Superkubogi va yana bir qator sovrinlarni qo‘lga kiritib, nomzodlar orasidan joy oldi. Yilning eng yaxshi klubi 26-oktabr kuni Londonda o‘tkaziladigan “Oltin to‘p” taqdirlash marosimida aniqlanadi.
Ma’lumot uchun, 2025-yilda mazkur sovrin “Pari Sen-Jermen”ga nasib etgan edi. Parijliklar o‘tgan mavsumda Chempionlar Ligasida g‘olib chiqqan va bu yil ham sovrinni qo‘lga kiritish uchun nomzodlar qatoridan joy olgan.
