YChLni muddatidan avval tark etgan ikki klub nomi maʼlum boʻldi
Seshanba, 20 yanvar kuni Chempionlar ligasi umumiy bosqichining 7-turi doirasida o‘tkazilgan uchrashuvlardan so‘ng musobaqani muddatidan avval tark etgan dastlabki ikki jamoa ma’lum bo‘ldi.
Turnir bilan xayrlashgan klublar — Olmaotaning «Qayrat» hamda Ispaniyaning «Vilyarreal» jamoasi bo‘ldi. Ular mos ravishda «Bryugge» va «Ayaks»ga mag‘lubiyatga uchradi.
Har ikkala jamoa ham yetti turdan so‘ng atigi bir ochko jamg‘argan. Pley-offning 1/16 finalida ishtirok etish huquqini beradigan so‘nggi — 24-o‘rinda hozircha «Kopengagen» joylashgan bo‘lib, uning hisobida yakuniy tur oldidan 8 ochko mavjud.
Qolgan barcha klublar esa umumiy bosqich yakunlariga ko‘ra top-24 talikka kirish uchun nazariy imkoniyatlarni saqlab qolmoqda.
Shuningdek, seshanba kuni Chempionlar ligasining 1/8 finaliga yo‘l olgan ilk jamoa ham aniqlandi. U Londonning «Arsenal» klubi bo‘lib, Mikel Arteta shogirdlari 7 o‘yinda 7 g‘alaba qayd etdi.
