YChL. Yarimfinal yoʻllanmasini qoʻlga kiritgan dastlabki ikki jamoa nomi maʼlum boʻldi
Seshanba, 14 aprel kuni UEFA Chempionlar Ligasining yarimfinalida ishtirok etadigan dastlabki ikki jamoa nomi ma’lum bo‘ldi. Bular — Fransiyaning «PSJ» va Ispaniyaning «Atletiko Madrid» klublaridir.
Parijliklar chorak final javob uchrashuvida «Liverpul» ustidan 2:0 hisobida g‘alaba qozonishdi. Bir hafta oldin bo‘lib o‘tgan dastlabki o‘yinda ham Yevropaning amaldagi chempionlari xuddi shunday hisobda (2:0) zafar quchishgan edi.
«Matraschilar» esa javob bahsida «Barselona»ga imkoniyatni boy berishganiga qaramay (1:2), dastlabki uchrashuvdagi ishonchli g‘alaba (2:0) evaziga keyingi bosqich yo‘llanmasini qo‘lga kiritishdi.
Yarimfinalda «Atletiko» jamoasi «Arsenal» — «Sporting» juftligi g‘olibi bilan to‘qnash keladi (ushbu jamoalar o‘rtasidagi birinchi o‘yinda «kanonirlar» 1:0 hisobida ustun kelgan). «PSJ» esa final yo‘llanmasi uchun «Real Madrid» yoki «Bavariya»ga qarshi bahs olib boradi (bu juftlikning ilk uchrashuvida myunxenliklar 2:1 hisobida g‘alaba qozonishgan).
