YChL. «Real» Valverdening xet-triki evaziga «Man Siti»ni yirik hisobda magʻlub etdi, Husanov toʻliq oʻynadi
UEFA Chempionlar Ligasining 1/8 final bosqichi doirasidagi Madridning «Real» va «Manchester Siti» klublari o‘rtasidagi ilk uchrashuv yakunlandi. Madrid shahridagi «Santyago Bernabeu» stadionida bo‘lib o‘tgan mazkur bahs ispanlarning 3:0 hisobidagi g‘alabasi bilan yakunlandi.
Uchrashuvning 20, 27 va 42-daqiqalarida Federiko Valverde raqib darvozasini ishg‘ol qilib, xet-trik qayd etdi. Uchrashuvning dastlabki goli darvozabon Tibo Kurtuaning uzatmasidan so‘ng kiritildi. O‘yinning 58-daqiqasida «Real» hujumchisi Vinisius Junior tomonidan tepilgan 11 metrlik jarima zarbasi «Manchester Siti» darvozaboni Janluiji Donnarumma tomonidan qaytarildi.
Jamoalar o‘rtasidagi javob uchrashuvi 17 mart kuni Manchester shahridagi «Etihad» stadionida o‘tkazilishi rejalashtirilgan.
Eslatib o‘tamiz, «Real» pley-off bosqichiga qadar «Benfika» klubini ikki o‘yin natijasiga ko‘ra 3:1 hisobida mag‘lub etgan edi. «Manchester Siti» esa Chempionlar ligasining umumiy bosqichini 16 ochko bilan sakkizinchi o‘rinda yakunlagan.
YChL. 1/8 final
«Real» — «Man Siti» 3:0
Gollar: Valverde (20, 27, 42).
Foydalanilmagan penalti: Vinisius (58).
