YChL. Dramatik kechgan bahsda «Bavariya» «Real»ni turnirdan chiqarib yubordi
Chempionlar Ligasining chorak final javob uchrashuvi doirasida Myunxenning «Bavariya» va Madridning «Real» jamoalari o‘rtasidagi bahs yakunlandi. Uchrashuv myunxenliklarning 4:3 hisobidagi g‘alabasi bilan yakunlandi.
«Real» yarimhimoyachisi Arda Gyuler uchrashuvning birinchi daqiqasidayoq myunxenliklar darvozaboni Manuel Noyerning xatosidan unumli foydalanib, hisobni ochdi. Mezbonlar vakili Aleksandr Pavlovich 6-daqiqada muvozanatni tikladi. Gyuler 29-daqiqada jarima zarbasidan unumli foydalanib, mehmonlarni yana hisobda oldinga olib chiqdi. «Bavariya» hujumchisi Harri Keyn esa 38-daqiqada hisobni 2:2 ko‘rinishiga keltirdi. Kilian Mbappe 42-daqiqada madridliklarning uchinchi golini urdi.
Ikkinchi bo‘limning 86-daqiqasida «qaymoqranglilar» yarimhimoyachisi Eduardu Kamavinga maydondan chetlatildi. 89-daqiqada Luis Dias hisobni tenglashtirdi. Uchrashuv so‘ngida, 90+4-daqiqada Maykl Olise g‘alaba golini kiritdi.
Dastlabki uchrashuvda ham «Bavariya» «Real»ni 2:1 hisobida mag‘lub etgan edi. Shu tariqa, myunxenliklar Chempionlar Ligasining yarimfinaliga yo‘llanma oldi va bu bosqichda «PSJ» bilan to‘qnash keladigan bo‘lishdi.
Ma’lumot uchun, 1/8 final bosqichida madridliklar ikki o‘yin natijasiga ko‘ra «Manchester Siti»ni 5:1 hisobida mag‘lub etishgan. Myunxenliklar esa xuddi shu bosqichda «Atalanta»ni umumiy 10:2 hisobida tormor keltirishgan edi.
