YChL. «Budyo-Glimt» oʻz maydonida «Inter»ni ishonchli hisobda magʻlub etdi
Yevropa Chempionlar Ligasining pley-off bosqichi dastlabki uchrashuvida Norvegiyaning «Budyo-Glimt» jamoasi o‘z maydonida «Inter»ni qabul qildi. Budyodagi «Aspmyura» stadionida o‘tgan bahs mezbonlarning 3:1 hisobidagi ishonchli g‘alabasi bilan yakunlandi.
O‘yinning 21-daqiqasida Sondre Brunstad hisobni ochib, norvegiyaliklarni oldinga olib chiqdi. 30-daqiqaga kelib, «Inter» hujumchisi Franchesko Espozito javob to‘pini kiritishga muvaffaq bo‘ldi. Biroq ikkinchi bo‘limda mezbonlar bosimni oshirishdi: 61-daqiqada Yens Petter Xyauge jamoasining ikkinchi golini urgan bo‘lsa, oradan uch daqiqa o‘tib Kasper Xyog hisobni 3:1 ko‘rinishiga keltirdi.
Jamoalar o‘rtasidagi javob uchrashuvi 24 fevral kuni Milandagi mashhur «San-Siro» stadionida bo‘lib o‘tadi.
Eslatib o‘tamiz, umumiy bosqich yakunlariga ko‘ra, «Budyo-Glimt» 9 ochko bilan 23-o‘rinni, «Inter» esa 15 ochko bilan 10-pog‘onani egallagan edi.
Chempionlar Ligasi. Pley-off
«Budyo-Glimt» — «Inter» 3:1
Gollar: Brunstad (21), Xyauge (61), Xyog (64) — Espozito (30).
