Xulian Alvares ketma-ket ikkinchi kun “Atletiko” mashg‘ulotini o‘tkazib yubordi
Madridning “Atletiko” klubi hujumchisi Xulian Alvares ketma-ket ikkinchi kun jamoa mashg‘ulotida qatnashmadi. Argentinalik futbolchi bu safar ham kasalligi sabab mashg‘ulotga kelmagan.
Alvares bir kun avval ham o‘zini yaxshi his qilmayotgani va uyqu bilan bog‘liq muammolar sabab mashg‘ulotni o‘tkazib yuborgan edi. Hozircha uning qachon umumiy guruhga qaytishi ma’lum qilinmagan.
Ayni paytda hujumchining kelajagi ham muhokama qilinmoqda. “Atletiko” Alvaresni “Barselona”ga qo‘yib yuborishni istamayapti. Shu fonda futbolchi faoliyatini “Arsenal”da davom ettirish imkoniyatini ham ko‘rib chiqayotgani xabar qilinmoqda.
Ma’lumot uchun, “Atletiko” 29-avgust kuni La Liganing 3-turida safarda “Sevilya”ga qarshi maydonga tushadi. Alvaresning ushbu uchrashuvda ishtirok etishi hozircha noma’lum.
