Xulian Alvares “Atletiko” mashg‘ulotlariga qaytdi
Madridning “Atletiko” klubi Xulian Alvaresning jamoa mashg‘ulotlariga qaytganini rasman ma’lum qildi. 2026-yilgi Jahon chempionatida ishtirok etgan argentinalik hujumchi ta’tildan so‘ng klub qarorgohiga yetib kelgan. U bilan birga Markos Lorente, Aleks Baena va Xuan Musso ham jamoaga qaytgan.
10-avgust kuni futbolchilar tibbiy ko‘rikdan o‘tdi. Endilikda ular jismoniy tayyorgarlik bo‘yicha murabbiylar nazorati ostida maxsus dastur asosida shug‘ullanadi. Keyinchalik futbolchilar “Atletiko”ning umumiy guruh mashg‘ulotlariga qo‘shilishi rejalashtirilgan.
Alvaresning Madridga qaytishi uning kelajagi haqidagi transfer mish-mishlari fonida alohida e’tibor tortmoqda. Avvalroq hujumchi avval bosh murabbiy Diego Simeone, keyin esa klub rahbariyati bilan uchrashib, “Atletiko”ni tark etish istagini shaxsan bildirmoqchi ekani haqida xabarlar tarqalgan edi.
Shuningdek, argentinalik futbolchining “Barselona”ga o‘tishni istayotgani aytilmoqda. Biroq hozircha Alvaresning transferi bo‘yicha rasmiy kelishuv mavjud emas. Ayni paytda futbolchi “Atletiko”ga qaytgan va yangi mavsumga tayyorgarlik jarayonini Madrid klubi bilan boshlaydi.
