Xulian Alvares “Atletiko” mashg‘ulotini o‘tkazib yubordi
“Atletiko” hujumchisi Xulian Alvares jamoaning navbatdagi mashg‘ulotida ishtirok etmadi. Bu haqda jurnalist Ruben Uriya ma’lum qildi. Madrid klubi vakillari ham argentinalik futbolchining mashg‘ulotda bo‘lmaganini tasdiqlagan.
Manbaga ko‘ra, Alvares kechasi yaxshi uxlamagan va o‘zini yomon his qilgani sababli mashg‘ulotga kelmagan. Futbolchining holati klub tomonidan nazorat qilinmoqda.
Argentinalik hujumchi yaqinda “Atletiko” muxlislarining tanqidiga ham uchradi. La Liga 1-turida “Vilyarreal”ga qarshi 2:2 hisobidagi uchrashuvda madridlik muxlislar Alvaresni hushtakbozlik bilan kutib olishdi.
Ma’lumot uchun, Alvaresning yozgi transfer oynasi davomida “Atletiko”ni tark etib, “Barselona”ga o‘tishni istayotgani haqida xabarlar tarqalgan. Biroq Madrid klubi futbolchini qo‘yib yuborish niyatida emas.
