Xavi: «Mening «Barsa» murabbiyi sifatidagi bobim yopildi»
Kataloniyaning «Barselona» klubi sobiq bosh murabbiyi Xavi Ernandes kelajakda yana «ko‘k-anorranglilar» boshqaruviga qaytishi borasidagi savollarga aniq javob berdi.
La Vanguardia nashriga bergan intervyusida ispaniyalik mutaxassis klubdagi faoliyati yakunlanganini ta’kidladi:
«Mening «Barsa» murabbiyi sifatidagi bobim yopildi, buni hozir shunday ko‘ryapman. Men ortga qaytmayman», — dedi Xavi.
Eslatib o‘tamiz, Xavi 2021 yildan 2024 yilga qadar «Barselona»ni boshqargan va ushbu davrda Ispaniya chempionligi hamda mamlakat Superkubogida zafar quchgan edi. Bungacha u Qatarning «Al Sadd» klubida murabbiylik qilgan.
Hozirda hech qaysi jamoada faoliyat yuritmayotgan mutaxassis atrofida turli mish-mishlar yuribdi. Xususan, so‘nggi xabarlarda uning xizmatiga Marokash milliy terma jamoasi tomonidan qiziqish bildirilayotgani aytilmoqda.
