Vozinya Messi bilan bo‘lgan suhbatini aytib berdi
Kabo-Verde terma jamoasi darvozaboni Vozinya JCh-2026 1/16 finalida Argentinaga qarshi o‘yindan keyin Lionel Messi bilan bo‘lgan suhbatini esladi.
Uning aytishicha, o‘yin tugagach, u Messi yoniga borgan. Ammo Vozinya biror narsa deyishga ulgurmasidan, Messi uni quchoqlab, o‘yinini yuqori baholagan.
Messi darvozabonga uning ajoyib o‘ynaganini va yaqinlari u bilan faxrlanishi kerakligini aytgan.
Vozinya esa Messiga minnatdorchilik bildirib, uni eng zo‘r futbolchi deb atagan. Shundan so‘ng u argentinalik yulduzdan ushbu o‘yindagi futbolkasini so‘ragan.
Messi bunga rozi bo‘lib, futbolkani tunnelda berishini aytgan. Vozinya esa bu kabi lahzalarni umrining oxirigacha eslab qolishini ta’kidladi.
Eslatib o‘tamiz, Argentina Kabo-Verdeni qo‘shimcha vaqtdan so‘ng 3:2 hisobida mag‘lub etdi. Kabo-Verde musobaqani tark etgan bo‘lsa-da, jamoa o‘z xarakteri va kurashi bilan muxlislar hurmatiga sazovor bo‘ldi.