Vozinya Jahon chempionatlari tarixiga kirdi
Kabo-Verde terma jamoasining 40 yoshli darvozaboni Jozimar Vozinya JCh-2026 guruh bosqichining 1-turida Ispaniyaga qarshi kechgan oʻyinda (0:0) oʻz darvozasi daxlsizligini saqlab qoldi. Shu tariqa, ushbu futbolchi jahon birinchiliklari tarixida debyut uchrashuvida darvozasini daxlsiz saqlagan eng yoshli darvozabonga aylandi.
Ushbu bahsdan soʻng Ispaniya va Kabo-Verde terma jamoalari bittadan ochko jamgʻarib, «H» guruhi turnir jadvalida peshqadamlik qilmoqda. 15-iyundan 16-iyunga oʻtar kechasi mazkur guruhning 1-turi doirasida Saudiya Arabistoni va Urugvay terma jamoalari oʻrtasida uchrashuv boʻlib oʻtadi.
«H» guruhining 2-turida Ispaniya milliy terma jamoasi Saudiya Arabistoni bilan (21-iyun), 3-turda esa Urugvay bilan (27-iyun) toʻqnash keladi. Kabo-Verde esa 2-turda Urugvay (22-iyun), 3-turda Saudiya Arabistoni (27-iyun) bilan oʻynaydi.
Eslatib oʻtamiz, futbol boʻyicha Jahon chempionati — 2026 musobaqasi AQSH, Kanada va Meksika maydonlarida 11-iyundan 19-iyulga qadar boʻlib oʻtmoqda. Amaldagi jahon chempioni Argentina terma jamoasi hisoblanadi. 2022-yilgi sayyora birinchiligi finalida Argentina milliy jamoasi Fransiya bilan toʻqnash kelgan. Oʻyinning asosiy vaqti 3:3 hisobida yakunlangan, biroq penaltilar seriyasida argentinaliklar kuchliroq chiqqan edi (4:2).
