Vinisius Junior ruhiy muammolar sababli tanaffus olgan Ronald Arauxoni qo‘llab-quvvatladi
Madridning «Real» klubi hujumchisi Vinisius Junior maydondagi ashaddiy raqobatni chetga surib, olijanoblik ko‘rsatdi. AS nashrining xabar berishicha, braziliyalik futbolchi ruhiy salomatligidagi muammolar tufayli faoliyatida tanaffus e’lon qilgan «Barselona» himoyachisi Ronald Arauxoga qo‘ng‘iroq qilib, unga dalda bildirgan.
Chempionlar Ligasi doirasidagi «Chelsi»ga qarshi o‘yindan (0:3) so‘ng, Arauxo ruhiy holati yomonlashgani sababli «Barselona»ning barcha musobaqalardagi so‘nggi yettita uchrashuvini o‘tkazib yubordi. Klub urugvaylik himoyachiga tiklanishi uchun maxsus ta’til taqdim etgan.
OAV ma’lumotlariga ko‘ra, Arauxo ma’naviy ko‘mak topish maqsadida Quddus shahriga safar uyushtirgan va u yerdagi muqaddas qadamjolarni ziyorat qilgan.
Ushbu kutilmagan tanaffusga qadar Arauxo kataloniyaliklar tarkibida muhim o‘rin tutayotgan edi. Joriy mavsumda u 20 ta o‘yinda maydonga tushib, 3 ta gol urishga ulgurgan. Transfermarkt portali 26 yoshli himoyachining bozor qiymatini hozirda 25 million yevro deb baholamoqda.
