Uotkins “Al-Hilol” bilan shartnoma shartlarini kelishib oldi
“Aston Villa” hujumchisi Olli Uotkins Saudiya Arabistonining “Al-Hilol” klubiga o‘tishga yaqin. Angliyalik futbolchi Saudiya jamoasi bilan shartnoma shartlarini kelishib olgan. Bu haqda insayder Nikolo Skira ma’lum qilgan.
Manbaga ko‘ra, 30 yoshli futbolchi “Al-Hilol” bilan 2029-yilgacha mo‘ljallangan shartnoma bo‘yicha kelishuvga erishgan. Endi Saudiya klubi transferni yakunlash uchun “Aston Villa” bilan muzokaralarni davom ettirmoqda.
Avvalroq Uotkinsning transferi “Al-Hilol”ga 55,8 million yevroga tushishi mumkinligi haqida xabar berilgandi. Angliyalik hujumchi yangi mavsum boshlanishidan oldin Saudiya klubiga o‘tish istagini bildirgani haqida ham ma’lumotlar tarqalgan.
Ma’lumot uchun, Uotkins 2025/26-yilgi mavsumda barcha musobaqalarda 55 ta uchrashuvda maydonga tushib, 21 ta gol urgan va 5 ta golli uzatmani amalga oshirgan.
