“Uotford” futbolchisi Michail Antonio 6 oyga haydovchilik huquqidan mahrum qilindi
“Uotford” hujumchisi Michail Antonio avtomobili bilan bog‘liq qoidabuzarlik bo‘yicha politsiyaga haydovchi shaxsini taqdim etmagani uchun olti oyga transport vositasini boshqarish huquqidan mahrum qilindi. 36 yoshli futbolchiga, shuningdek, jami 2 050 funt miqdorida jarima va sud xarajatlari belgilandi. Bu haqda Press Association (PA) xabar bermoqda.
Manbaga ko‘ra, voqea 2025-yil 5-noyabr kuni London markazidagi Pall Mall ko‘chasida sodir bo‘lgan. Antonioning Lamborghini Urus avtomobili ehtiyotsiz boshqarilgani qayd etilgach, Metropolitan Police futbolchidan o‘sha paytda rulda kim bo‘lganini ma’lum qilishni talab qilgan. Biroq tegishli ma’lumot o‘z vaqtida taqdim etilmagani sabab ish sudgacha yetib borgan.
Antonio sudda voqea vaqtida Manchesterda bo‘lganini va avtomobilini boshqa shaxsga ijaraga berish uchun qarindoshiga topshirganini aytgan. Shuningdek, u politsiyaning dastlabki xatini olmaganini ta’kidlagan. Biroq sud bu vajlarni yetarli deb topmadi. Futbolchining haydovchilik guvohnomasida avvaldan 6 ta jarima balli bo‘lgan, yangi qoidabuzarlik uchun yana 6 ball qo‘shilgach, avtomatik ravishda olti oylik taqiq kuchga kirdi.
Ma’lumot uchun, Michail Antonio 2026-yil sentabrida “Uotford” bilan bir yillik shartnoma imzoladi. U bundan avval “Vest Hem” safida 10 yil to‘p tepib, Premyer-ligada 268 ta uchrashuvda 68 ta gol urgan va klubning ushbu turnirdagi eng yaxshi to‘purari hisoblanadi. 2024-yil dekabrida Antonio og‘ir avtohalokatga uchrab, oyog‘ini sindirgan va uzoq muddat futbolsiz qolgan edi.
