UFF. Iste’dodlarni izlab: Samarqand viloyatida seleksiya boshlandi
O‘zbekiston futzal federatsiyasi tashabbusi bilan yosh va iste’dodli futzalchilarni aniqlash, ularni kashf etish hamda yoshlar va o‘smirlar terma jamoalariga jalb etishga qaratilgan seleksiya loyihasi izchil davom etmoqda.
Bugun ishchi guruhi Samarqand viloyatida navbatdagi ko‘rik-seleksiya jarayoniga start berdi. Dastlabki kun sinovlari viloyat Futbol akademiyasi sport zalida tashkil etilib, unda 30 nafardan ortiq iqtidorli yosh futbolchi ishtirok etdi.
Mashg‘ulotlar va ko‘rik-nazorat uchrashuvlari davomida ishtirokchilar o‘z mahoratlarini O‘FF Terma jamoalar bilan ishlash departamenti rahbari Dilshod Rahmatov, O‘zbekiston yoshlar terma jamoasi bosh murabbiyi Nodir Eliboyev hamda o‘smirlar terma jamoasi bosh murabbiyi Shuhrat Tojiboyev boshchiligidagi mutaxassislar oldida namoyish etishdi.
Seleksiya ertaga ham shu manzilda davom etadi. 2007–2010-yillarda tug‘ilgan (16–19 yosh) iqtidorli futzalchilar o‘z imkoniyatlarini sinab ko‘rishlari mumkin.
Ikki kunlik ko‘rik yakunlariga ko‘ra, Samarqand viloyatidan saralab olingan eng iqtidorli nomzodlar keyingi bosqichga tavsiya etiladi.
