«U yetakchi, barchaning hurmatiga sazovor». Koshta – JChdagi Ronaldu haqida
Portugaliya terma jamoasining sobiq himoyachisi Rikardu Koshtaning aytishicha, tanqidlarga qaramay, hujumchi Krishtianu Ronaldu jamoa kiyinish xonasida umumiy hurmatga ega.
Ikki kun oldin Portugaliya jamoasi JCh-2026 1-turida Kongo DR bilan durang o‘ynadi (1:1). 41 yoshli hujumchi samarali harakatlari bilan ajralib turmadi va o‘yindan so‘ng tanqidga uchradi.
«Hamma Krishtianuga quloq soladi. U o‘z jamoadoshlarini ruhlantiradigan yetakchi va milliy terma jamoaga ulkan yordam berishda davom etmoqda.
Jamoadan tashqarida u haqida ko‘p gapirishadi, lekin ichkarida u umumiy hurmatga ega», – deya Koshtaning so‘zlarini keltiradi Marca.
K guruhining 2-turida Portugaliya milliy terma jamoasi O‘zbekiston bilan (23 iyun), 3-turda esa Kolumbiya bilan (28 iyun) o‘ynaydi.
