Tuxel: «Keyn faoliyatidagi eng yaxshi sport formasida turibdi»
Angliya terma jamoasi bosh murabbiyi Tomas Tuxel 2026 yilgi jahon chempionati chorak finalida Norvegiyaga qarshi o'yin oldidan jamoa sardori Harri Keynning o'yiniga yuqori baho berdi.
«Har bir o'yin oldidan aynan u haqida gapiramiz, chunki uchrashuvlar taqdirini hal qiladigan futbolchi shu. Uni maqtash uchun endi so'z ham topolmay qoldim. U — bizning yetakchimiz, sardorimiz. Menimcha, u faoliyatidagi eng yaxshi sport formasida turibdi. Harri haqiqiy jamoaviy futbolchi va har doim mas'uliyatni o'z zimmasiga olishga tayyor. Uning sardorimiz ekanidan ham, menga uning murabbiyi bo'lish nasib etganidan ham faxrlanaman», — dedi Tuxel Sky Sport'ga.
Angliya va Norvegiya terma jamoalari o'rtasidagi 2026 yilgi jahon chempionati chorak final bahsi 12 iyul kuni bo'lib o'tadi. Uchrashuv Toshkent vaqti bilan soat 02:00da start oladi.
