«Tottenhem» sardori Kristian Romero yozda klubni tark etishga qaror qildi
«Tottenhem» klubi himoyachisi va sardori Kristian Romero joriy mavsum yakunlangach, London jamoasi bilan xayrlashish niyatida. 27 yoshli argentinalik futbolchi rahbariyatga yozgi transfer oynasida jamoani tark etish istagi haqida ma’lum qilgan.
The Telegraph nashrining xabar berishicha, futbolchining ushbu qarori qat’iy va klubning mavsum oxiridagi natijalariga (xususan, Yevrokuboklardagi ishtirokiga) bog‘liq emas.
Romero va klub o‘rtasidagi munosabatlar so‘nggi vaqtlarda keskinlashgani kuzatilmoqda. Xabarlarga ko‘ra, futbolchi klub rahbariyatining sport loyihasiga bo‘lgan yondashuvidan norozi. Uning ketishi «Tottenhem»ning kelgusi mavsum uchun rejalashtirilgan tarkib yangilash strategiyasidagi ilk yirik o‘zgarishlardan biri bo‘lishi kutilmoqda.
Kristian Romero joriy mavsumda «shporlar» safida barqaror o‘yin ko‘rsatib kelmoqda. U 2025/2026 yilgi mavsum davomida barcha musobaqalarda 28 ta o‘yinda maydonga tushib, 6 ta gol urdi va 4 ta golli uzatmani amalga oshirdi. Himoyachi bo‘lishiga qaramay, hujum chizig‘idagi samaradorligi bilan ham ajralib turibdi.
Argentinalik futbolchiga Ispaniya La Ligasi klublari va boshqa nufuzli chempionatlar vakillari jiddiy qiziqish bildirmoqda. Romero 2022 yilda «Atalanta»dan 52 million yevro evaziga sotib olingan edi, uning amaldagi shartnomasi esa 2029 yilga qadar mo‘ljallangan. Hozirgi kunda Transfermarkt portaliga ko‘ra, futbolchining bozor qiymati 60 million yevro atrofida baholanmoqda.
