«Tottenhem» himoyachi Ben Devisni vaqtinchalik bosh murabbiy etib tayinlamoqchi
Londonning «Tottenhem» klubi vaqtinchalik bosh murabbiy lavozimiga jamoaning amaldagi himoyachisi Ben Devis nomzodini ko‘rib chiqmoqda. Bu haqda The Telegraph nashri xabar bermoqda.
«Shporlar» himoyachisi yanvar oyida to‘pig‘idan jarohat olganidan beri maydonga tushmayapti. Shu sababli, APL klubi rahbariyati 32 yoshli futbolchini mavsum yakuniga qadar bosh murabbiy vazifasini bajaruvchi sifatida tayinlash variantini jiddiy o‘rganib chiqmoqda.
Ma’lum qilinishicha, Devis jamoadagi eng hurmatga sazovor o‘yinchilardan biri hisoblanadi va hozirda murabbiylik litsenziyasi uchun o‘qishni davom ettirmoqda.
Eslatib o‘tamiz, bugun, 29 mart kuni «Tottenhem» Igor Tudorni bosh murabbiy lavozimidan ozod etganini e’lon qildi. Uning qo‘l ostida jamoa 7 ta o‘yindan 5 tasida mag‘lub bo‘ldi. Ayni damda London klubi 30 ochko bilan APL turnir jadvalida 17-o‘rinni egallab turibdi va quyi ligaga tushib ketish zonasidan bor-yo‘g‘i bir ochko oldinda, xolos.
