«Tottenhem» «Bornmut» himoyachisi Markos Senesi bilan kelishuvga erishdi
Londonning «Tottenhem» klubi «Bornmut»ning 29 yoshli himoyachisi Markos Senesi bilan kelishuvga erishdi. Bu haqda taniqli jurnalist va insayder Nikolo Skira xabar bermoqda.
Manbaning ma’lum qilishicha, Senesi «Tottenhem» safiga erkin agent maqomida kelib qo‘shiladi va klub bilan 2030 yilga qadar mo‘ljallangan shartnoma imzolaydi. Uning yillik maoshi 5 million yevroni tashkil etadi.
Senesi o‘z faoliyatini «Feyenoord» klubida boshlagan bo‘lib, u yerdan 2022 yilda 15 million yevro evaziga «Bornmut»ga ko‘chib o‘tgan edi. Argentinalik himoyachi klub safida jami 128 ta uchrashuvda maydonga tushib, 6 ta gol urdi va 10 ta golli uzatmani amalga oshirdi.
Ayni damda, Transfermarkt portali berayotgan ma’lumotlarga ko‘ra, Senesining bozor qiymati 22 million yevroga baholanmoqda.
