Toshkentda futbol tibbiyoti bo‘yicha xalqaro seminar bo‘lib o‘tdi
Toshkent shahrida O‘zbekiston futbol assotsiatsiyasi tomonidan Milliy olimpiya qo‘mitasi binosida futbol tibbiyoti sohasiga bag‘ishlangan xalqaro seminar tashkil etildi.
Tadbir davomida futbolchilarning tiklanish jarayonlari, jarohatlarning oldini olish usullari, ratsional ovqatlanish, mashg‘ulot yuklamalarini boshqarish, jismoniy va funksional holatni testdan o‘tkazish, turli ob-havo sharoitlarida mashg‘ulot olib borish, shuningdek individual reabilitatsiya va monitoring masalalari keng muhokama qilindi.
Seminarda klublar shifokorlari va sport direktorlari ishtirok etib, xalqaro tajriba bilan yaqindan tanishish, dolzarb savollarga mutaxassislardan bevosita javob olish imkoniyatiga ega bo‘ldilar.
Ushbu tadbir sport tibbiyotining zamonaviy yondashuvlarini ommalashtirish, futbolchilarning sog‘ligini saqlash hamda ularning sportda yuqori natijalarga erishishlariga ko‘maklashish maqsadida muhim qadam bo‘lib xizmat qiladi.
