Timur Kapadze: Yoshlarga imkoniyat beramiz, sog'lom raqobat bo'ladi
O‘zbekiston terma jamoasi bosh murabbiyi Timur Kapadze jahon chempionatiga tayyorgarlik jarayonida faqat "eski gvardiya"ga tayanmasligini ta’kidladi.
“Bizda barqaror poydevor bor, ammo hali vaqt ham, bir nechta o‘rtoqlik o‘yinlari ham oldimizda. Yangi futbolchilarni sinovdan o‘tkazamiz. Agar o‘yinchi o‘zini ko‘rsatsa, uni albatta tarkibga qo‘shishni ko‘rib chiqamiz. Sog‘lom raqobat va barqarorlikka erishish — maqsadimiz,” — dedi Kapadze.
Uning so‘zlariga ko‘ra, FIFA kunlaridan maksimal foydalangan holda, ko‘proq o‘rtoqlik uchrashuvlari o‘tkazish rejalashtirilgan. Kapadze CAFA Millatlar Kubogini ham qimmatli musobaqa sifatida baholadi:
“Bu turnir qisqa vaqt ichida turli raqiblarga qarshi o‘ynash imkonini beradi va yangi o‘yinchilarni sinovdan o‘tkazish uchun yaxshi maydon bo‘ladi. Har qanday o‘yin va musobaqa, qay darajada bo‘lishidan qat’i nazar, tayyorgarlik uchun foydali.”
