Tiago Silva Yevropaga qaytish imkoniyatini koʻrib chiqmoqda
41 yoshli «Fluminense» himoyachisi Tiago Silva o‘z oilasiga yaqinroq bo‘lish uchun Yevropaga qaytish imkoniyatini ko‘rib chiqmoqda. Bu haqda Globo xabar berdi. Silvaning oilasi Angliyada istiqomat qiladi.
Futbolchi klubni mavsum oxirida tark etadi, garchi uning shartnomasi 2026 yil iyunigacha amal qilsa ham. Klub rahbariyati shartnomani uzaytirmoqchi, ammo futbolchining shaxsiy istagini ham tushunmoqda.
Himoyachi Italiyaning «Milan» klubidan tushishi mumkin bo‘lgan takliflarni ham rad etmaydi — Italiya matbuotiga ko‘ra, ushbu klub transfer uchun asosiy da’vogar sifatida qaralmoqda. Silva faoliyatini oilasi yaqinida yakunlamoqchi va uning uchun farzandlari yoniga tez-tez borib turish imkoniyati eng muhim omil. Uning farzandlari «Chelsi» akademiyasida to‘p suradi.
Qayd etilishicha, Silvaning rejalarida uch yil ichida murabbiylik faoliyatini boshlash ham bor.
Eslatib oʻtamiz, avvalroq u «Milan», «PSJ» va «Chelsi» klublarida o‘ynagan. Braziliya terma jamoasi safida Tiago Silva 113 ta o‘yin o‘tkazib, 7 ta gol urgan.
