Ter Shtegen jarohat olganiga qaramay «Jirona»ni tark etmaydi
Darvozabonning jarohatiga qaramay, «Barselona» va «Jirona» o‘rtasidagi Mark-Andre ter Shtegen bo‘yicha tuzilgan ijara kelishuvi muddatidan avval to‘xtatilmaydi. Bu haqda Mundo Deportivo jurnalisti Fernando Polo o‘z ijtimoiy tarmoqlarida ma’lum qildi.
2 fevral kuni 33 yoshli germaniyalik posbonning son qismidan jarohat olgani ma’lum bo‘ldi — tashxisga ko‘ra, mushaklarning yirtilishi va paylarning shikastlanishi aniqlangan. Dastlabki ma’lumotlarga ko‘ra, tiklanish jarayoni ikki oygacha davom etishi mumkin.
Bunday vaziyatda «Jirona» ijarani muddatidan avval tugatish va darvozabonni «Barselona»ga qaytarish huquqiga ega edi. Biroq Polo aniqlik kiritishicha, Kataloniya klubi ijara shartnomasi iyun oyiga qadar o‘z kuchida qolishini tasdiqlagan. Shu bilan birga, agar zarur bo‘lsa, Ter Shtegen reabilitatsiya jarayonini «Barselona» bazasida o‘tashi mumkin bo‘ladi.
Ma’lumot uchun, darvozabon 21 yanvar kuni «Jirona» safiga o‘tgan edi va jamoa tarkibida ikkita uchrashuvda — «Xetafe» (1:1) hamda «Ovyedo» (0:1)ga qarshi bahslarda maydonga tushishga ulgurdi.
