Sud «PSJ»ga Mbappega 61 million yevro toʻlash majburiyatini yukladi
Sud Fransiyaning «PSJ» klubini jamoaning sobiq hujumchisi Kilian Mbappega ish haqi bo‘yicha kompensatsiya sifatida 61 million yevro to‘lashga majbur qildi. Qaror bir ovozdan qabul qilingan bo‘lib, hukm darhol ijroga yo‘naltiriladi. Bu haqda RMC Sport nashri xabar bermoqda.
Eslatib o‘tamiz, 2025 yil noyabr oyida Mbappe «PSJ»dan jami 263 million yevro miqdorida tovon puli talab qilgani haqida ma’lum bo‘lgandi. Ushbu summa futbolchiga shartnoma muddati yakunlangach to‘lanmagan maosh va bonuslar, shuningdek, klubda unga nisbatan bo‘lgan munosabat uchun kompensatsiyani ham o‘z ichiga oladi.
Kilian Mbappe 2024 yil yozida «Pari Sen-Jermen»ni erkin agent sifatida tark etgan edi. Shundan so‘ng u Madridning «Real» klubiga ko‘chib o‘tdi va hozirda ham aynan ushbu jamoa safida to‘p surmoqda.
